विधिः
सम्पूर्ण सामाग्रीहरु जम्मा भएपछि कुनै चिजले एक निम्ठो चामल भर्ने अनि त्यसलाई एउटा टपरामा खन्याउने त्यसमाथि दियो बाल्ने । दियोसँगै साया गर्ने व्यक्तिको साथबाट अथवा उसको नामको केही पैसा पनि राख्ने । साया गर्ने व्यक्ति अगाडी आएर थान छेउमा बस्ने अथवा उसको कपडा अगाडी राख्ने खुकुरी अनिवार्य भिरेको हुन्ुपर्छ । दोवाङ्गले कुलपितृलाई पुकार्दै बल माग्दै विधिलाई अगाडी बढाउँछन्। हे कुलपितृ हो माङ्गछामा हो । यस घरका तिमीहरुको छोरा पौवापरदेश गर्दा बाटोघाटो हिँड्दा खोलानाला तर्दा भुलचुकमा उसको शिर ढल्यो होला । साक्षात देख्ने तिमीहरु छौ अनि यो घरको शक्तिको स्रोत नै तिमीहरु हौ । त्यसैले रक्षा गरिदेउ अनि फेरि पनि अस्तिर्झै यो तिम्रो सन्तानको शिर उठाइदेउ भनि बिन्ति बिसाउँदैछौं। हे कुलपितृ हो माङ्गछामा हो घरको रखवाला हो यो छोराको शिर ढलेको भए यो भाले चढाएर यसै भालेको शिरले उसको ढलेको शिर उठाइदेउ अनि सँधै शिर ठडाएर हिँड्न मद्दत गर सँधै हिमाल झैं अटल र उच्च शिर पारेर हिँड्न सकोस्यो छोराले। लौ है बल देउ भन्दै सोलोलो …….सोलोलो……सोलोलो भन्दै तीन पटक भन्नुपर्छ अनि यतिबेला साया गर्ने व्यक्तिलाई उभन्दा कान्छो भाइहरुले उचाल्नु पर्छ । यो बेला उसले गुलेली तथा बन्दुक बोक्नुपर्छ साथै रक्सी पनि पिएको जस्तो गर्नुपर्छ । त्यसपछि भालेलाई रेटी मारिन्छ अनि पोलेर टाउकोको भाग चाहि थानमा चढाउनुपर्छ । उक्त टाउको पछि साया गरेको व्यक्ति आफुले मात्र खानुपर्छ । यसरी टाउको थानमा चढाएपछि दोवाङ्गले लौ है यो छोराको ढलेको शिर उठाइयो कुलपितृ हो भुलचुकमा गल्ति भए माफ गरिदेउ अनि सँधै यो छोराको रक्षा गर शिर सँधै उच्च राख्न मद्दत गर भनी समापन गर्दछन्। समापन पश्चात दियो राखेको टपरीको चामल फेरी अघिकै भाँडाले नाप्नुपर्छ र त्यो चामल अघिभन्दा बढेर आउँछ भन्ने मान्यता छ । यदि बढेर आयो भने त्यो कार्य सफल भएको मान्नुपर्छ र उक्त चामल छुट्टै पकाएर साया गरिएको व्यक्ति एक्लैले खाइसक्नु पर्छ ।